Gugma ang nagapadaba-daba sa tagipusuon sang mga maestro kag maestra kada sila magtudlo sa mga kabataan nga ila ginatatap kag gina-atipan. Kag bisan sila nagtaliwan na, ang ila man gugma kag mga ginbilin nga leksyon sa aton kabuhi ang pinakaulihi nga magapalong.
Amo ini ang ginsigurado sang mag-asawa nga Julius kag Louelyn Reyes, lunsay mga maestro sang Iloilo City National High School, sang sila gakabuhi pa.
Masubo nga balita ang gin-atubang sang nabilin nga pamilya, mga kakilala, kag labi na gid ang mga estudyante kag anay estudyante sang mag-asawa nga Reyes, matapos ang sunog nga nagluntad sang kaagahon sang Marso 8 sini lang nga tuig, sa ila panimalay.
Wala nakaluwas ang mag-asawa kag ang ila 7-anyos nga bata nga si Amber sa kalayo nga nag-umpisa sa ila balay kag nagtapos sang ila kabuhi sa Brgy. Infante, Molo, Iloilo.
Ginapatihan nga naghalin ang sunog sa problema sa electrical wiring sang ila balay nga ginatunga sa duwa ka bahin. Sila nga pamilya ang ara sa likod nga bahin kag ang kapid naman ni Louelyn ang sa parte lapit sa kalsada nga nangin rason para sila makalagyo pa sa sunog.
Takna las singko sang kaagahon gindeklara nga fire out na ang lugar kag haligi na lamang sang ila balay ang nabilin nga ginsidlakan sang adlaw.
Sa dira nga tini-on, tatlo ka kabuhi ang nadula.
Madamo sa ila mga kakilala ang indi magpati sang kinaangtan sang ila kabuhi, labi na gid diri ang ila anay estudyante nga si Gab.
Para kay Gab, asta sa subong mabudlay batunon ang reyalidad nga ang iya mentors, titsers, kag nangin pangaduwa nga ginikanan, hindi niya na makita liwat.
Grade 1 lang siya sang nakilala niya ang mag-asawa nga anay gatudlo sa Baluarte Elementary School. Luwas sa ila propesyon sa pagka-maestro kag maestra, may ara sila nga ginapanag-iyahan nga art workshop kon sa diin man si Gab nag-eskwela kag ang iya pa gid duwa ka mga utod.
"So ever since grade 1 nahasa na ako sa painting especially ang expertise nila is mixed media, painting, kag poster making, so dira kami nag-connect ni sir Julius."
Ang ila workshop nga Sining Figura dugay na nga nagabulig maghanas sang mga estudyante nga may talento sa visual art.
Para kay Gab, luwas sa mga "art terminologies" nga pirme ginamitlang nanday Julius kag Luoelyn, time-management kag disiplina ang nagapabilin sa iya nga gintudlo sang mag-asawa.
Parehas man sa iya, ang iya magurang nga si Milagros nga estudyante man sang maestro kag maestra nagapangasubo sa pagkadula sang pamilya.
Apang nagapabilin sa gihapon ang ila mga gintudlo.
*Sundon ko gid hasta mapatay ko ang gintudlo nila which is to do my art authentic sa akon and do it outside the box, always and in all ways," suno naman kay Milagros.
Grade 6 lang si Gab sang ulihi sila nagkiritaay kag nakahambal "thank you" sa isa kag isa.
Apang magapabilin gid sa iya ang imahen niya nga kaupod si sir Julius habang ginakaptan ang tropeyo sang siya nagdaog siya sa Dinagyang painting contest nga mas dako pa sa iya.
Ang magapadayon
Kaleidoscope. Sa ini nga bagay ginlaragway ni Gab sina sir Julius kag ma'am Louelyn.
"When things are seemingly the way [they are], [when they] turn around, it is even more beautiful."
Ang ila paglakat kaupod ang ila nga bata nga si Amber may kasubo man nga dala apang magapadayon ang katahom nga ila ginbilin sa mga taliambong nga ila ginatudlo, mga leksion nga ila ginpabalon sa ila mga estudyante, kag ang ila gugma nga ginhatag sa tagsa tagsa ka estudyante nga ginkabig nila kaugalingon nga mga bata.
"I can see them everywhere, I can recall what they've done," para kay Gab, ini ang magapadayon bisan wala na sila.